Outonho

Ne l einício de l outono ls pelhiços inda ne l castanheiro arreganhában ls dientes i deixában pingar las castanhas. Ls pelhiços inda fechados, l aire botaba-los pal chano. Cun la suola de l carcalhal de ls çapatos, lhebában apertones contra l chano, las castanhas çpedien-se de l sou pelhiço, dando poulos de cuntentes, relhuzindo al sol. Cun l cesta acuquelhada era çpejada nas alforjas, que la burra trasportaba para casa. 

Ne l praino solo habie castanhas pa l gasto de las famílias. Quemien-se al lhargo de outonho i de l'eimbierno; crudas, cozidas i assadas al lhume ne l assador, çpindurado de las lhares. Ne l serano juntában-se cun ls bezinos, i jogában l 'arremunhana cun ls bilhós.