Sega de l feno

La yerba na permabera crecie por todos ls caneiros i era neçairo aporbeitá-la pa l eimbierno. Guardában-se alguns cerrados ne ls meses de márcio, abril i parte de maio. ( nun podien ser pacidos) La yerba zampolhinaba sien tino i passado esse tiempo, ls lhameiros éran segados puls gadanheiros i ls  baranhos quedában a secar al sol. L feno yá bien seco era trasportado  ne l carro de las bacas, para l triato i serbie de alimientaçon  als animales,  to l'eimbierno.

Primabera I

Na permabera todo zampolhina i relhuç  na natureza i dá bida a todos ls seres bibos. Ye un jardin quelorido i las nabiças cunfirman isso, serbindo de alimiento para la cria. La buiada pacie ne l cerrado, anquanto las duonhas apanhában las nabiças para aquemudar la bacas, que merecien ser bien stimadas porque fazien parte de la bida  deilhas i de la sue  suberbibéncia.

Lhuita de ls buis

Ne l praino mirandés ye questume fazer la lhuita de ls buis. L duonho de cada bui, ten la proua de lhebar l sou bui bien tratado i fuorte para bencir la lhuita cul sou par. Essas pegas arrástran giente de todos  ls cuncelhos lhemitres. A las bezes ls buis quedan serenos, i nien siempre dan la lhuita que todo mundo  gostaba de ber.

Buiada mirandesa

La buiada mirandesa era andespensáble nua casa de lhaboura. Las bacas éran la mano dreita de l home, an todos ls trabalhos. Eilhas relbában, bimában la tierra, fazien la semienteira, aricában, acarreában todo l pan pa las eiras, trilhában-lo, trasportában l grano i la palha para casa. Puxando l arado, abrien ls sucos para poner i arrincar las batatas i tantas outras cousas. Cun todo esse trabalho zampenhado, inda criában ls bitelos que fazien parte de l sustiento eiconómico de las famílias. 

Relba

L restrolho i l marfolho spergidos pulas tierras, quedában molidos, çfeitos puls ganados i pul eimbierno. Na permabera las yerbas crecien, cun toda la gana i cobrien las tierras cun tapiete quelorido. La junta de bacas cun la charrua fazie la relba (purmeira boulta que se daba a la tierra) i rebolbie aqueilha yerbaçada toda, quedando uns tiempos, a spera de la bima. (Segunda boulta que se  daba a la tierra, antes de la semiemteira).

Trilha

Cun l pan todo nas eiras, cumbinaba-se l ampeço de la trilha. Al lhado de cada bornal quedaba un spácio çtinado pa la trilha. Ampeçában-se a  spipar ls manolhos de l bornal, zatában-se i spergien-se nesse spácio arredondado que le dában l nome de parba. Ls trilhos puxados pula junta de bacas, dies a filo, dában buoltas sien cuonta, porriba de todo aquel cereal, anté acabar de l  trilhar todo. Se benisse ua tronada, cun la parba stendida, habie que l’aparbonar para la porteger de la chuba. La parba era rebolbida cul biendo, bárias  bezes durante la trilha, anté quedar bien çfeita, an munha, capaç de  ser lhimpa, cun la fuorça de l aire.

Anfornando l pan

 Cun la massa çpierta acendie-se l forno i era  arroijado cun  buonos barçados de lheinha. Nesse antertiempo, anquanto l forno se calcie, fenhie-se la massa, anbolbiendo las bolhas de massa an farina i eili quedaba a çcansar, anquanto l forno s'arroijaba. Cun l suolo de l forno bien caliente i todo l cielo de l miesmo zbranquiçado, staba ne l puonto cierto para meter l pan i cozer la fornada.